पोखरा, ७ मंसिर । पोखरामा मनमाया गीतको म्युजिक भिडियो सार्वजनिक गरिएको छ ।

शुक्रबार एक कार्यक्रमका बीच उक्त गीतको सार्वजनिक गरिएको हो । किरण शंकर र सुमिना लोको आवाजमा रहेको गीतलाई नेपाल आइडल सिजनवानका विजेता बुद्ध लामाले संगीत भर्नुभएको छ ।

राम अबिरल बिष्टको शब्द रहेको गीतको अडियो संयोजन लामाले नै गर्नुभएको हो । अर्को प्रोडक्सनको निर्माणमा तयार भएको गीतलाई रोहन नेपालीले निर्देशन गर्नुभएको हो भने अनुप गुरुङले खिच्नुभएको हो ।

म्युजिक भिडियोमा मिलन शंकर, अश्विनी शाही र राजेश बस्नेत लगायतको अभिनय रहेको छ । महिलामाथि दमन हुँदा पुरुष कसरी रक्षाकवच बन्छ त्यसलाई गीतको म्युजिक भिडियो मार्फत प्रस्तुत गरिएको छ । म्युजिक भिडियोले समाजको वेथालाई बोलेको छ ।

निर्देशन सँगै कथामा समेत रोहन नेपालीले मेहेनत गर्नुभएको छ । उहाँका अनुसार मनमाया गाउँको कथा हो । गीतमा रमाइलो भन्दा पनि सन्देश प्रवाह गर्न खोजिएको उहाँले बताउनुभयो । मनमाया गीतले सबैको मन छुनेमा उहाँ आशावादी हुनुहुन्छ ।

कलाकार मिलन शंकरले आफुले अहिलेसम्म थुप्रै म्युजिक भिडियोमा अभिनय गरेको तर गाउँले परिवेशको कथामा पहिलो पटक देखिएको उल्लेख गर्नुभयो ।

मनमायाका लागि आफु प्रस्तुत भएको पात्र नयाँ भएको भनाई उहाँको छ । नयाँ धुन र शब्दको संगम राम्रो भएकाले पनि मनमायाले आम जनमानसको माया पाउने उहाँले बताउनुभयो ।

गायक तथा संगीतकार विनोद बानियाँले पोखरामा पछिल्लो समय एक पछि अर्को म्युजिक भिडियो सार्वजनिक भएको देख्न पाउँदा खुशी लागेको बताउनुभयो ।

चलचित्र निर्देशक नेत्र गुरुङले मनमाया गीतमा मेहेनत देखिएको बताउनुभयो । छन् । मनमाया हाइलाइटस नेपाल युटुब मार्फत सार्वजनिक भएको छ ।