पोखरा, १ असार । नक्कली सुन देखाई ठगी गर्ने दुई जनालाई प्रहरीले पक्राउ गरेको छ ।

प्रहरीले सिन्धुलीको दुधौली नगरपालिका वडा नं. १० कोगटी बस्ने ४४ वर्षीय बिमल तामाङ र मकवानपुरको हेटौडा उपमहानगरपालिका वडा नं.२ बस्ने ४१ वर्षीय सन्तोष मगरलाई पक्राउ गरेको हो ।

निजहरुलाई शंकास्पद अवस्थामा हिडिरहेको अवस्थामा पोखरा महानगरपालिका वडा नं.२६ अर्घौचोकबाट पक्राउ गरिएको हो । निजहरुको साथबाट सुन जस्तो देखिने पहेँलो रंगको धातु ३ थान, विभिन्न कम्पनीका मोवाईल ३ थान र नगद पाँच हजार चार सय ३५ रुपैयाँ बरामद गरिएको प्रहरीले जनाएको छ ।

कास्की जिल्ला अदालतबाट ठगी,आपराधिक विश्वास घात तथा आपराधिक लाभ (एक्सटर्सन) सम्बन्धी कसुरमा १० दिन म्याद थप गरी निजहरुको अनुसन्धान प्रकृया अगाडि बढाइएको छ ।