पोखरा, ९ वैशाख । वैशाख १० गते हुने उपनिर्वाचनलाई लक्षित गरी विभिन्न स्थानका सडक बन्द गरिने भएको छ ।

आज बसेको जिल्ला सुरक्षा समिति तनहुँको बैठकले पृथ्वी राजमाग सहित अन्य केही सडक बन्द गर्ने निर्णय गरेको हो ।

१० गते आइतबार पृथ्वी राजमार्गमा पर्ने तनहुँ जिल्लाको क्षेत्र नं १ मा हुने प्रतिनिधि सभा सदस्यको उपनिर्वाचन हुँदैछ ।

निर्वाचनलाई लक्षित गरी बिहान ५ बजेदेखि साँझ ६ बजेसम्म पृथ्वी राजमार्ग अन्तर्गतको मुग्लिङ पुलदेखि व्यास नगरपालिकाको चापाघाट ( मादी नदीको पुलको पश्चिम भाग) सम्म, डुम्रे– वेशीसहर सडक खण्ड, आँबुखैरेनी – गोरखा सडक खण्ड, दमौली–दुईपिप्ले लगायतका सडक बन्द गरिने भएको छ ।

ती सडकमा दमकल, एम्बुलेन्स, खानेपानीको ट्यांकर, दुध बोक्ने सवारी साधन, शवबाहन, फोहोर मैला ओसार्ने सवारी, अस्पतालमा कार्यरत चिकित्सक, स्वास्थ्यकर्मी, अस्पतालको परिचय पत्रसहित चलेका सवारी साधन र सूचना तथा प्रशारण विभागबाट जारी प्रेस पास भएका पत्रकार चढेका सवारी साधन बाहेक सबै प्रकारका सवारी साधनहरु पूर्ण रुपमा बन्द रहने जिल्ला प्रशासन कार्यालय तनहुँको सूचनामा उल्लेख छ ।

तनहुँ जिल्ला भएर चल्ने रात्री बसहरु भने १० गते बिहान चार बजे अगावै जिल्ला पार गरिसक्नु पर्ने सूचनामा जनाइएको छ ।