पोखरा, ६ फागुन । गण्डकी प्रदेशमा वर्ड फ्लु भित्रिन सक्ने सम्भावना रहेकाले आवश्यक सावधानी र सतर्कता अपनाउनुपर्ने निष्कर्ष निकालिएको छ ।

प्रादेशिक एभियन ईनफलुएन्जा रोग नियन्त्रण प्राविधिक समन्वय समितिको पोखरा बिहीबार बसेको बैठकले त्यस्तो निष्कर्ष निकाल्दै पंक्षि र पंक्षिजन्य पदार्थको ओसारपसारमा निगरानी बढाउने निर्णय गरेको छ ।

गण्डकी प्रदेश मुख्यमन्त्री तथा मन्त्रिपरिषद् कार्यालयका प्रमुख सचिव विष्णु प्रसाद नेपालको अध्यक्षतामा बसेको बैठकले वर्ड फ्लुसँग सम्वन्धित नमूनाको संकलन र परिक्षण बढाउने पनि निर्णय गरेको पशुपंक्षि तथा मत्स्य विकास निर्देशनालका प्राविधिक अधिकृत सुरेशकुमार श्रेष्ठले जानकारी दिए ।

बैठकले उच्च जोखिममा रहेका जिल्लाहरुममा वर्ड फ्लु सम्वन्धी चेतनामूलक सन्देश प्रवाह गर्ने पनि निर्णय गरेको छ ।

त्यस्तै बैठकले वर्ड फ्लु रोकथाम र नियन्त्रणका लागि यसअघि गठित समिति पनि पुर्नगठन गरेको छ ।

केही समय पहिले माघ १६ गते भारतमा र माघ २७ गते काठमाण्डौंको तारकेश्वर नगरपालिकामा वर्ड फ्लु रोग देखिएपछि त्रास बढेको छ ।