पोखरा, २९ वैशाख । विश्व नर्स दिवस – २०७५ को अवसर पारेर समाजवादी अध्ययन केन्द्र भक्तपूरले पोखरामा शनिवार अपाङ्गता भएका एक सय १० जनालाई विभिन्न सामाग्री वितरण गरेको छ ।

नेपाल निजामति कर्मचारी युनियन(संघ) कास्कीले आयोजना गरेको कार्यक्रममा ३० थान सेतो छडी, ५० थान झुल , ४०÷४० थान रेडियो÷पेनड्राइभ, एक थान व्हिल चेयर र एक थान वैशाखी वितरण गरिएको हो ।

अपाङ् मैत्री समाज कास्कीको समन्वयमा करिव एक लाख ६७ हजार मूल्य बराबरको सामाग्री वितरण गरिएको थियो ।

अपाङ्गताको क्षेत्रमा मन जोड्ने अभियान हो समाजवादी अध्ययन केन्द्रका अध्यक्ष दुर्गाप्रसाद फुयालले भने – ‘आवश्यकता महसुस भएका स्थानमा जान्छौ र सामाग्री वितरण गर्छाै।’

कार्यक्रमका प्रमुख अतिथि सांसद बद्रि पाण्डेले अपाङ्गता भएकाहरुका लागि राज्यको तर्फबाट गरिएका व्यवस्थाहरु लागु गर्नुपर्नेमा जोड दिए ।

संविधानमा हक त लेखिएको छ, संविधान कार्यन्वयनका लागि कानुन चाहिन्छ उनले भने – ‘संविधान कार्यन्वयनका लागि कानुन बनाउन सक्रिय हुने समय आएको छ।’ उनले प्रजातान्त्रिक समाजवाद अनुकुल संविधान बनेको उल्लेख गरे ।

कास्की काँग्रेसका सभापति कृष्ण केसीले सूचना प्रविधिको वर्तमान युगमा सूचना प्रविधिसँग खेल्न नसक्ने व्यक्ति अपाङ्गता हुने बताए ।

प्रदेश नम्बर ४ का सांसद विन्दुकुमार थापाले अपाङमैत्री कानुन आवश्यक रहेको औल्याए ।

नेपाल विद्यार्थी संघका केन्द्रीय उपाध्यक्ष डिल्लि सुवेदीले हरेक व्यक्तिसँग केहि न केहि क्षमता हुनेभन्दै क्षमता पहिचान गर्नुपर्नेमा जोड दिए ।

कर अधिकृत विजय लामिछानेले अपाङ्गताका क्षेत्रमा जिम्मेबार व्यत्तिहरु पनि गैरजिम्मेबार बन्ने गरेको उल्लेख गरे ।

समाजवादी अध्ययन केन्द्रका संरक्षक शान्तिकृष्ण अधिकारी, महिला नेतृ उर्मिला थपलिया, चरक नर्सिङ एकेडेमीका प्राचार्य सृजना पण्डित, अपाङमैत्री समाज कास्कीका अध्यक्ष सन्तबहादुर नेपालीले बोलेका थिए ।

नेपाल निजामति कर्मचारी युनियन (संघ) कास्कीका अध्यक्ष डार्बिन लम्सालको अध्यक्षतामा भएको कार्यक्रममा समाजवादी अध्ययन केन्द्र कास्कीका संयोजक अर्जुन गुरुङले स्वागत र प्रदेश नम्बर ४ का संयोजक जगतबहादुर पाठकले संचालन गरेका थिए ।