पोखरा, ४ बैशाख । नेपाली काँग्रेसका बरिष्ठ नेता रामचन्द्र पौडेलले पार्टी र पार्टीले सरकारको नेतृत्व गर्दा राम्रो काम गर्न नसकेका कारण पार्टी ओरालो लागेको बताएका छन् ।

राम्रो काम गरेर जनतालाई जवाफ दिन नसकेका कारण नै पार्टीले हार व्यहोरेको उनको भनाइ थियो ।

नेपाली काँग्रेस कास्कीले पोखरामा मङ्गलबार आयोजना गरेको कार्यकर्ता भेलामा बोल्दै उनले कम्युनिष्ट मिलेका कारण हा¥यौ भनेर भाग्न नमिल्ने उल्लेख गरे ।

राम्रो काम गर्न सकेको भए उनीहरु सवै मिल्दा पनि हामीले जित्थ्यौ उनले भने – ‘राम्रो गर्न सकेको भए यति तल पनि आउन्थेनौं।’

उनले शेरबहादुर देउवा र शुशील कोइराला मिलेर आफुलाई प्रधानमन्त्री बन्न समेत नदिएको दुःखेसो कार्यकर्ता माझ पोखे ।

त्यतिबेला के.पी ओली, विजयकुमार गच्छादार र कमल थापाले आफुलाई प्रधानमन्त्री स्वीकार गरेको भएपनि देउवा र कोइरालाले आफुलाई रोकेको उनको भनाइ छ ।

अहिलेसम्म यो कुरा कहिकतै बोलेको थिएन, आज भन्छुभन्दै देउवा र कोइरालाले आफुप्रति देखाएको व्यवहारप्रति चित्त दुःखाए ।

उनले अर्काे पटक चुनाव जित्नका लागि जनताको स्वार्थसँग गाँसिएर अघि बढ्नुपर्नेमा जोड दिए । पार्टीभित्र एकता जरुरी भएको र आफुले पनि एकता कायम गर्न चाहेको बताए ।

न्याय, निष्पक्षता र पारदर्शी मूल्यांकनबाट पार्टीभित्र एकता कायम गर्नुपर्ने पक्षमा आफु रहेको उनको भनाइ छ ।
बरिष्ठ नेता पौडेलले निष्ठा र आदर्शको राजनीतिलाई प्रोत्साहन गर्नुपर्नेमा जोड दिए ।

यसअघि बोल्ने एक दर्जन नेता तथा कार्यकर्ताले पार्टीलाई शशक्त बनाएर लैजानका लागि आग्रह गरेका थिए ।

नेपाली काँग्रेस कास्कीका सभापति कृष्ण केसीको अध्यक्षतामा भएको कार्यक्रम सचिव सुदिपमोहन भट्टराईले संचालन गरेका थिए ।