पोखरा, २३ फागुन । पोखरा लेखनाथ महानगरपालिका वडा नं १२ शितलादेवीका गुरुङ दम्पतीले बुधबार पोखरा लेखनाथ महानगरपालिका वडा नं १७ सितापाइलास्थित पोखरा बृद्वाश्रमलाई सहयोग गरेका छन् ।

८४ वर्षिय समाजसेवी तुलबहादुर गुरुङ र उनकी श्रीमती मुवा गुरुङले बृद्वाश्रमलाई २६ हजार तीन सय आर्थिक सहयोग गरेका हुन् ।

उनीहरुले बृद्वाश्रममा रहेका ६२ जना बृद्वाबृद्वालाई बुधबार बिहानको एक छाक भोजन समेत गराएका थिए।

लामो समयदेखि बेलायत बस्दै आएका गुरुङ दम्पतीले विदेशमा बृद्वबृद्वाको अवस्था निकै राम्रो रहेपनि नेपालमा भने पीडादायि जीवन भोग्नु परेको देखेर सहयोग गरेको बताए । उनीहरुले अरुलाई पनि बृद्वाश्रमलाई सहयोग गर्न आग्रह गरे ।

कार्यक्रममा बृद्वाश्रमका शिशिरकेशव पराजुलीले चारै तीरबाट प्राप्त भएको सहयोगबाट बृद्वाश्रम चलेको जानकारी दिए।