पोखरा। राष्ट्रिय हेमजा आलु महोत्सवको तेस्रो दिन आइतबार सम्म ५० लाख बढीको कारोबार भएको छ । महोत्सव मध्येतिर आउदाँ त्यहाँ दर्शक सहभागिता पनि बढ्दै गएको छ। शनिबार र आइतबार सार्वजनिक बिदा परेको र मौसमले समेत साथ दिँदा महोत्सवमा जनसहभागिता बढेको हो। दर्शक सहभागिता बढेसँगै त्यहाँ आलु लगायत अन्य उपभोग्य बस्तु किनबेच हुने क्रम पनि बढ्दै गएको छ ।

त्यहाँ आलुको परिकारको एउटा स्टल, ३० वटा कृषि स्टल तथा अन्य सय बढी व्यापारिक स्टल छन् । प्रतिकेजी रु.३५ मा आलुको कारोबार भएको छ। आइतबारसम्म रु. ८ लाख बढीको आलु बिक्री भएको आलु तथा कृषि उपज व्यवस्थापन उपसमिति संयोजक अर्जुन कार्कीले बताए ।उनले हालसम्म सबैभन्दा बढी ६० केजी र कम्तीमा १ केजीसम्म ग्राहकले आलु खरिद गरी लगेको पनि सुनाए।

सामान्यतया २० देखि ३० केजी किन्नेसम्म ग्राहक धेरै छन् ।कास्कीका छिमेकी पालिका लगायत पर्वत, बाग्लुङ, तनहुँ, स्याङ्जाबाट समेत आलु खरिदका लागि मानिसहरू आउने गरेको उनको भनाई छ।

हेमजाको आलु मिठो छ, चाँडो पनि पाक्छ, बजारियाको तुलनामा स्वास्थ्यकर पनि भएकाले आफूहरू आलु खरिदकै लागि आएको आइतबार दिउँसो महोत्सव स्थलमा भेटिएकी तनहुँ भिमादकी सुनिता श्रेष्ठले बताइन्।

महोत्सवमा आइतबार कलाकारहरू बद्री पङ्गेनी, ममता तामाङ, शान्ता वर्देवा, रोशन बिसी, नेत्र खड्का, परशुराम अधिकारी, मुना अर्याल, आयुषा खत्री, झलकमान् सारङ्गी पाठशाला लगायतले प्रस्तुति राखे। त्यस्तै सोमबार एन्जिला रेग्मी, रामजी पौडेल, सरस्वती लामिछाने, कमला गैह्रे, किसन नेपाली, भूमिका पङ्गेनी, राजेन्द्र गुन्दु्रके, मनोज गोर्खाली लगायतका प्रस्तुति रहने उल्लेख छ । त्यस्तै पप कन्सर्टतर्फ देउराली, लेकाली लगायतका ब्यान्डका प्रस्तुतिहरू रहनेछन्। महोत्सवमा आइतबारबाट रत्यौली गीत प्रतियोगिता पनि सुरु भएको छ।

महोत्सव अन्तर्गत त्यहाँ आलु तथा तरकारीको प्रदर्शन, आलुको पहाड निर्माण, आलुका विभिन्न परिकार, कृषकका लागि माटो, वोट विरुवा, परीक्षण तथा रोगको निधान, कृषक र कृषि सम्बन्धी विविध सांस्कृतिक कार्यक्रम भइरहेका छन्।

त्यस्तै कृषिझाँकीप्रतियोगिता, चर्चित कलाकारका दैनिक प्रस्तुतिलगायत विभिन्न कृषिउपज विउविजन तथा कृषियन्त्रको प्रदर्शनी लगायतका गतिविधि पनि संचालित छन्।

आइतबारसम्ममा २५ हजार बढी दर्शकले महोत्सव अवलोकन गरेको आयोजक विष्णुपादुका क्लबका अध्यक्ष वसन्तकुमार श्रेष्ठ जानकारी पनि दिए ।