पोखरा । पुष्प सदन एकेडेमी कास्की, पोखरा–१२ फूलबारीको ३८ औँ अभिभावक दिवस तथा पुरस्कार वितरण समारोह शनिवार सम्पन्न भएको छ ।

समारोहको उद्घाटन गर्दै प्रमुख अतिथि नेसनल प्याब्सन कास्कीका अध्यक्ष हेमन्त अधिकारीले विद्यार्थीलाई व्यवहारिक ज्ञानको खाँचो रहेको बताए ।

‘अव विद्यार्थीहरुलाई कक्षा कोठामा मात्रै सीमित गरेर पढाएको शिक्षाले गुणस्तर वृद्धि गर्न सकिँदैन’ अध्यक्ष अधिकारीले भने, ‘शिक्षाको गुणस्तर वृद्धि गर्नका लागि प्राक्टिल, नैतिक र व्यवहारिक ज्ञान दिने खालको शिक्षा आवश्यकता छ, त्यो यो विद्यालयमा रहेको छ।’

परिवार, समाज र राष्ट्रलाई परिवर्तन गर्न सक्ने क्षमता विद्यार्थीमा भएकोले विद्यार्थीले आफ्नो पढाई लाई प्रविधि र आयआर्जनको क्षेत्रसँग जोड्नु पर्ने उनको भनाई थियो ।

नेसनल प्याब्सन कास्कीका उपाध्यक्ष मनकाजी गुरुङले निजी विद्यालयमा आएका विभिन्न चुनौतीका वावजुत पनि विद्यालय अझै व्यवस्थित बनाउँदै लगेकोमा खुसी व्यक्त गरे । ‘शैक्षिक गुणस्तर सुधारका लागि विद्यालयले ल्याएका योजनाहरू उत्कृष्ट छन्’ उपाध्यक्ष गुरुङले भने, ‘विद्यालयले ल्याएका योजनालाई विद्यार्थीलाई परिपालन गर्दै गएका उत्कृष्ट विद्यालय बन्ने छ ।’
कार्यक्रममा २०८२ सालको स्पोर्ट मिट, तिज नृत्य प्रतियोगिता, अतिरिक्त क्रियाकलाप, २०८१ को शैक्षिक पुरस्कार एसइई २०८१ का विद्यार्थी पुरस्कार तथा मायाको चिनो प्रदान गरिएको थियो । कार्यक्रममा विद्यालय व्यवस्थापन समितिका सदस्य टिकाराम गुरुङ, सिमला आधारभूत विद्यालयका प्रधानाध्यापक देवेन्द्र राज परियार, पुष्प सदन एकेडेमी कास्कीकी सहायक प्रधानाध्यापक मञ्जु पहारी थापाले बोलेका थिए ।

पुष्प सदन एकेडेमी कास्कीका संस्थापक अध्यक्ष अजय थापाको अध्यक्षतामा भएको कार्यक्रममा विद्यालय कोअर्डिनेटर अर्जुन पौडेल र विद्यार्थी प्रज्ञा सापकोटाले स्वागत तथा शिक्षकद्धय शोभा पौडेल र प्रतीक्षा सेढाईले कार्यक्रम सञ्चालन गरेका थिए । कार्यक्रममा विद्यालयका विद्यार्थीले विविध सांस्कृतिक कार्यक्रम प्रस्तुत गरेका थिए ।