पोखरा । कास्की मोर्डनाइज्ड एकेडेमी सेकेण्डरी स्कुलमा शुक्रबारदेखि ‘कास्की मोर्डनाइज्ड महोत्सव–२०८२’ सुरु भएको छ ।

‘शैक्षिक क्षेत्रमा देखिएको आफ्नै पहिचान, हाम्रा विद्यार्थीको चौतर्फी क्षमता विकासमा हाम्रो अभियान’ भन्ने मूल नाराका साथ आयोजित महोत्सव शनिवार (भोलि) सम्म चल्ने छ ।

कला, साहित्य, शिक्षा, खेल, सृजना र मनोरञ्जनको सङ्गम स्थलको रूपमा हेरिएको उक्त महोत्सवमा विद्यालयका शिक्षक, विद्यार्थी, पूर्व विद्यार्थी, अभिभावकको जमघटको थलो बनेको छ ।

विद्यार्थीका अन्तर्निहित प्रतिभालाई प्रस्फुटन गर्ने उद्देश्यका साथ विद्यालयले पहिलो पटक महोत्सव आयोजना गरेको हो । महोत्सवमा विद्यालयका विद्यार्थीले बनाएका विभिन्न किसिमका वस्तु तथा परिकारहरू अभिभावकले किन्ने छन् । जुन वस्तु तथा परिकार विक्री गरेपछि खर्च कटाएर बचेको रकम स्वयम् विद्यार्थीले नै पाउनेछन् । 

शुक्रवार भएको महोत्सवमा कक्षा नर्सरी देखि २ सम्म र  कक्षा ८ देखि १० सम्मका विद्यार्थी पूर्व विद्यार्थी र अभिभावकको सहभागिता रहेको छ भने शनिवार कक्षा ३ देखि ७ सम्म र कक्षा ११, १२ सम्मका विद्यार्थी, अभिभावक र पूर्व विद्यार्थीको सहभागिता रहने छ । महोत्सवमा विद्यालयका विद्यार्थी, पूर्व विद्यार्थी तथा अभिभावकको प्रस्तुति रहेको थियो ।

हरेक वर्ष गरिने अभिभावक दिवसले सबै विधा  समेट्न नसक्ने भएर यस वर्ष दुई दिनको महोत्सव नै आयोजना गरिएको विद्यालयका संस्थापक प्रधानाध्यापक राम बहादुर मोचीले जानकारी दिए ।

‘कक्षा कोठाको सिकाइबाट मात्र अब्बल भएका विद्यार्थीहरू जीवनमा सफल नभएको धेरै उदाहरण छन्’ उनले भने, ‘कक्षा कोठा भन्दा बाहिरको सिकाइबाट जीवनलाई सफल र सबल बनाउन सक्ने भएकाले यो महोत्सव आयोजना गरेका हौँ ।’ विद्यार्थीका प्रतिभा पहिचान गर्नका लागि यो महोत्सव कोशेढुड्डा साबित हुने उनको विश्वास रहेको छ ।

‘यो महोत्सवमा विद्यालयका विद्यार्थीले विभिन्न वस्तु तथा परिकार बनाउँछन् जहाँ अभिभावक ग्राहक बनेर ती सामान किन्छन्’ उनले भने, ‘विद्यार्थीलाई पढाई सँगै वास्तविक सत्य र तथ्य बुझाउन पनि यो कार्यक्रम विद्यार्थीका लागि फलदायी हुनेछ ।’ नाम र दाम दुवै कमाउनका लागि विद्यार्थीहरूलाई महोत्सव सिकाई हुने उनले बताए ।

कार्यक्रमको उद्घाटन गर्दै पोखरा महानगरपालिका शिक्षा महाशाखाका प्रमुख हेमप्रसाद आचार्यले महोत्सवले विद्यार्थीहरूका प्रतिभाको यथार्थ पहिचान गर्ने बताए । ‘ बच्चा जन्मिने बित्तिकै केही न केही प्रतिभा लिएर आएको हुन्छ, जसको पहिचान गर्न सक्नु पर्दछ’ उनले भने, ‘यो महोत्सवले तिनै प्रतिभाको पहिचान गरी जीवन बाच्न सिकाउने काम गरेको छ जुन पोखरा महानगरपालिकालाई पनि सिकाई बनेको छ ।

उनले महोत्सवले विद्यार्थीलाई प्लेट फर्म दिएको बताउँदै विद्यालयले सिकाएका सिप र सिकाई लाई अभिभावकले दैनिकीको रूपमा आफ्ना छोरा छोरीलाई प्रेरित गर्न सकेमा मात्र महोत्सवले सार्थकता पाउने बताए । यो महोत्सव रमाइलोको लागि नभई सिकाईको लागि हो भन्ने अभिभावले बुझ्नु पर्ने उनको भनाई थियो ।

एन प्याब्सन कास्कीका अध्यक्ष हेमन्त अधिकारीले विद्यार्थीहरूको चौतर्फी विकास गर्ने काम यो महोत्सवले गरेको बताए । ‘एन प्याव्सनमा हुने वाल प्रतिभा पहिचान कार्यक्रमको पनि परिकल्पनाकार यसै विद्यालयका संस्थापका प्रधानाध्यापक अध्यक्ष राम बहादुर मोची सर हुनुहुन्थ्यो’ उनले भने,‘ एन प्याव्सनको कार्यक्रमको झल्को दिने गरी कार्यक्रम गर्नुभएको छ यो विद्यार्थीका लागि ठुलो अवसर हो ।’

हिसान कास्कीका अध्यक्ष दिवाकर जैसीले विद्यार्थीका विविध क्षमताको प्रतिभा प्रस्फुटन गर्न थलो महोत्सव वनेको बताए । रामेश्वरी मावि व्यवस्थापन समितिका अध्यक्ष अधिवक्ता बोधराज बरालले निजी विद्यालयले गरेका यस्ता कार्यक्रम सामुदायिक विद्यालयलाई सिकाई हुने बताए । महोत्सवमा विद्यालयको शैक्षिक तथा अतिरिक्त क्रियाकलाको पुरस्कार वितरण समेत गरिएको थियो । 

विद्यालय व्यवस्थापन समितिकी अध्यक्ष राधा नेपालीको अध्यक्षतामा भएको उद्घाटन सत्रमा विद्यालयका सहायक प्रधानाध्यापक शिवलाल उपाध्याय, शैक्षिक प्रमुख शिवु ढकाल, शिक्षक अनुराग अधिकारी, विद्यार्थी जोसना गुरुङ, निशु गुरुङले बोलेका थिए ।