पोखरा, १० भदौ । गण्डकी प्रदेशको अर्थ तथा विकास समितिले निर्धारित समयमा काम नगर्ने ठेकेदारलाई कारवाही गर्न निर्देशन दिएको छ ।

गण्डकी प्रदेशका भौतिक पूर्वाधार, सहरी विकास तथा यातायात ब्यवस्था मन्त्रालयका सचिव सहितलाई बोलाएर गरिएको छलफलपछि समितिका सभापति दीपक कोइरालाले त्यस्तो निर्देशन दिनुभएको हो ।

समितिले मन्त्रालयलाई रातो किताबमा परेका योजना नकाट्न निर्देशन दिएको छ । रातो किताबमा परेका योजना बजेट अभाव देखाएर काट्ने गरेको गुनासो आएको भन्दै समितिका सभापति कोइरालाले मन्त्रालयलाई निर्देशन दिदै भन्नुभयो,‘रातो कितावमा परेका योजना कोल्याप्स गर्ने काम रोक्न समिति निर्देशन दिन्छ ।’ समितिले महत्वपूर्ण योजनालाई आयोजनाका रुपमा अगाडि बढाउनपनि निर्देशन दिएको छ ।

समितिले चौमासिकको अन्तिममा मात्रै काम हुने र बजेट सक्ने गरिएकोप्रति ध्यानाकर्षण भएको जनाउँदै अबका दिनमा चौमासिक पुग्नु अगाडि नै काम गर्ने वातावरण निर्माण गर्न पनि मन्त्रालयलाई निर्देशन दिएको छ ।

मन्त्रालयका सचिव रामचन्द्र श्रेष्ठले राम्रा काम गर्ने कम्पनीलाई समयमै भुक्तानी दिने र प्रोत्साहन गर्ने तथा ढिलासुस्ती गर्ने, समयमै काम नसक्ने, गुणस्तर कायम नगर्ने निर्माण कम्पनीलाई मन्त्रालयले कारवाहीको दायरामा ल्याउने काम गरिरहेको बताउनृभयो ।