पोखरा, २१ असार । कास्कीमा असार २८ गते सोमबार कोभिड १९ विरुद्वको भेरोशिल खोप लगाइने भएको छ ।

जेठ २७ गते खोप लगाएकाहरुलाई दोस्रो मात्राको खोप दिन लागिएको हो । त्यतिबेला कास्की जिल्लाका विभिन्न वडाहरुका खोप केन्द्रहरुमा ६२ वर्ष पूरा भई ६५ वर्ष ननाघेका नागरिकलाई खोप दिइएको थियो ।

यसअघि जेठ २७ गते खोप लगाएको खोप केन्द्रबाट नै खोप लगाउने व्यवस्था मिलाइएको स्वास्थ्य कार्यालय कास्कीका प्रमुख बाबुराम आचार्यले जानकारी दिनुभयो ।

उहाँले भेरोशिल खोप पहिलो मात्रा लगाएको खोप कार्ड अनिवार्य रुपमा लिएर खोप केन्द्रमा गई जनस्वास्थ्यका मापदण्ड पालना गरी खोप सेवा लिन अनुरोध गर्नुभएको छ ।

बिहान १० बजेदेखि दिउँसो ४ बजेसम्म खोप लिन सकिने छ ।