एक महिनामा अक्सिजन उत्पादन शुरु हुन्छ – बतास

राष्ट्र न्यूज सम्वाददाता
जेठ २३, २०७८
Ananda

पोखरा, २३ जेठ । पोखराको पोखरा स्वास्थ्य विज्ञान प्रतिष्ठान पश्चिमाञ्चल क्षेत्रीय अस्पतालमा अक्सिजन प्लान्टको काम तीव्र गतिमा अघि बढेको छ ।

अक्सिजन प्लान्ट निर्माण समितिका संयोजक आनन्द बतासका अनुसार, अक्सिजन प्लान्टका लागि फ्रान्सको नोभा एयर कम्पनीसँग मेशिन खरिद प्रक्रिया अघि बढिसकेको छ ।

अब करीब चार हप्तामा मेशिन पोखरा आइपुग्ने र त्यसको २ दिनपछि नै अक्सिजन उत्पादन शुरु हुने संयोजक बतासको भनाइ छ ।

‘सबैको सकारात्मक सहयोगमा काम अघि बढेको छ, संयोजक बतासले भन्नुभयो – अबको एक महिनामा अक्सिजन उत्पादन शुरु हुन्छ।’
प्लान्टका लागि नागरिकस्तरबाट २ करोड ६० लाख रुपैयाँ संकलन भैसकेको छ ।

आर्थिक सहयोग जुटाउन अभियानमा करीब चार हजार जनाले आर्थिक सहयोग गर्नुभएको छ । करीब तीन करोड ३० लाखको लगानीमा अक्सिजन प्लान्ट निर्माण गरिने योजना छ ।

अक्सिजन प्लान्टले दैनिक एक सय सिलिण्डर अक्सिजन उत्पादन गर्न सक्ने र एक सय जना बिरामीलाई पुग्ने संयोजक बतासले बताउनुभयो।

Related News

सम्बन्धित समाचार