पोखरा, ३० वैशाख । नेपाल पत्रकार महासंघ कास्कीका सदस्य तथा गण्डकी टेलिभिजन पोखराका प्रवन्ध निर्देशक जगन्नाथ पौडेल ‘गणेश’ कोे असामयिक निधनले नेपाल प्रेस युनियन कास्की मर्माहत भएको छ ।

कोरोना भाइरस  (कोभिड—१९) संक्रमण भइ विगत ११ दिनदेखि उपचाररत पौडेलको गण्डकी मेडिकल कलेजमा आज ४१ वर्षको उमेरमा भएको असामयिक निधनले युनियन स्तब्ध भएको हो ।

नेपाल प्रेस युनियन कास्कीका अध्यक्ष नवीन सिग्देल र सचिव प्रदीप पौडेलद्वारा संयुक्त रुपमा जारी शोक विज्ञप्तिमा दिवंगत आत्माको चिरशान्तिको कामना गर्दै शोकसन्तप्त परिवारमा धैर्यधारण गर्न सक्ने शक्ति भगवान्ले प्रदान गरुन् भनी कामना गरिएको छ । कामप्रति बफादार र हक्की स्वभावका पौडेल २०६५ सालदेखि गण्डकी टेलिभिजनमा कार्यरत हुनुहुन्थ्यो ।

गण्डकी टेलिजिभनको कार्यक्रम गण्डकी छड्केको छायाँकनमा खटिएकै अवस्थामा पौडेललाई वैशाख २० गते कोरोना संक्रमण भएको हो ।

पोखरा महानगरपालिका वडा नं ३३ बाघमारा निवासी स्वर्गीय पौडेलका आमा, श्रीमती र २ छोरा हुनुहुन्छ ।