मकवानपुर, १९ वैशाख (रासस)।  मकवानपुरगढी गाउँपालिका–४ डुम्रेकुनामा आज चट्याङ लागेर गम्भीर घाइते भएका विराट वाइबाको मृत्यु भएको छ ।

घाइते मकवानपुरगढी–२ बस्ने २६ वर्षीय बिराजको मृत्यु भएको जिल्ला प्रहरी कार्यालय मकवानपुरका प्रहरी निरीक्षक अविनाश अधिकारीले जानकारी दिनुभयो ।

उहाँका अनुसार चट्याङ लागेर गम्भीर घाइते भएका उनलाई उपचारका लागि हेटौँडा अस्पताल लगिएकामा चिकित्सकले मृत घोषणा गरेका हुन् ।

उनको शव परीक्षणका लागि हेटौँडा अस्पतालमा राखिएको जिल्ला प्रहरी कार्यालय मकवानपुरले जनाएको छ । त्यस्तै चट्याङ लागेर घाइते भएका स्थानीयवासी ५६ वर्षीय वीरबल वाइवा र ४६ वर्षीय वीरबहादुर वाइवाको भने हेटौँडा अस्पतालमा उपचार भइरहेको जनाइएको छ ।

आज दिउँसो पानी परेपछि नजिकै रहेको बद्री घिमिरेको गोठमा ओत लाग्न पुगेका उनीहरू चटयाङ लागेर गम्भीर घाइते भएका थिए ।