पोखरा, ५ वैशाख । प्रत्येक १० वर्षमा सञ्चालन गरिने राष्ट्रिय जनगणना यस वर्ष गरिदै छ ।
जनगणना सबै घर, बसोबास गरेका परिवार र व्यक्तिको विवरण संकलन गरी प्रशोधन एवं प्रकाशन गर्ने वृहत राष्ट्रिय कार्यक्रम हो ।
नेपालमा जनगणना वि.सं १९६८ देखि शुरू भएको हो । यस वर्ष सञ्चालन हुने जनगणना नेपालको १२ औं तथा देशको संघीय संरचना पछिको पहिलो हो ।
राष्ट्रिय जनगणना २०७८ मा गणना कार्र्य दुई चरणमा सञ्चालन गरिनेछ । जनगणनाको तयारीका लागि गणनामा खटिने जनशक्तिको क्षमता तथा सीप विकासका लागि विभिन्न चरणमा तालिम सञ्चालन भइरहेका छन् ।
अहिलेसम्म प्रदेश÷जिल्ला जनगणना अधिकारी, गणकलाई प्रशिक्षण गर्ने मुख्य प्रशिक्षक र स्थानीय जनगणना अधिकारीको तालिम सम्पन्न भएको छ । त्यसपछि सुपरिवेक्षकको तालिम वैैशाख १६–२२ गतेसम्म सञ्चालन हुनेछ ।
जनगणनामा पहिलो चरणमा वैशाख २६ गतेदेखि जेठ १४ गतेसम्म सुपरिवेक्षकले प्रत्येक घर तथा घरपरिवारमा पुगेर घर तथा घरपरिवार सूचीकरण फाराम भर्ने छन् ।
दोस्रो चरणमा जेठ २५ गतेदेखि असार ८ गतेसम्म गणकहरुले प्रत्येक घरपरिवारमा पुगेर मुख्य प्रश्नावलीमार्फत् विभिन्न विवरणहरु संकलन गर्ने छन् । गणकका लागि जेठ १७ देखि २२ गतेसम्म तालिम सञ्चालन हुनेछ ।
गण्डकी प्रदेशको पोखरामा गण्डकी प्रदेश जनगणना कार्यालय स्थापना गरी आवश्यक तयारी तीव्र पारिएको निर्देशक जगु बस्याल जानकारी दिनुभयो । कास्कीमा बगर, लेखनाथ, अन्नपूर्ण र मादीमा स्थानीय जनगणना कार्यालय स्थापना गरिएको छ ।
कास्की जिल्लामा पहिलो चरणमा एक सय ८० जना भन्दा बढी सुपरिवेक्षक र दोस्रो चरणमा ७ सय ७० भन्दा बढी गणक परिचालन गरिनेछ । कास्कीमा करीब एक लाख ७० हजार घरपरिवारमा जनगणना गरिने अनुमान गरिएको छ ।
निर्देशक बस्यालले घरघरमा आउने सुपरिवेक्षक तथा गणकलाई सत्यतथ्य विवतरण उपलब्ध गराउन अनुरोध गर्नुभएको छ ।
विभिन्न जाति, भाषा, धर्म, क्षेत्र, वर्ग, लिङ्ग तथा उमेर समूह अनुसार समग्रमा हामी कति छौं ? कहाँ छौ ? र कुन अवस्थामा छौ ? भन्ने थाहा पाउनु नै जनगणनाको प्रमुख उद्देश्य हो ।
जनगणनाको विवरणका आधारमा नै राज्यले आम नागरिकहरुको हितका लागि अब के गर्नुपर्छ ? कहिले गर्नुपर्छ ? र कसरी गर्नुपर्छ ? भन्ने जस्ता नीति, योजना तथा कार्यक्रमहरु तय गर्दछ ।
Related News
सम्बन्धित समाचार
पोखरा १३ मा सामाजिक सुरक्षा भत्ता लिन आउनेलाई निशुल्क स्वास्थ्य परीक्षण
अपाङ्गमैत्री कानून निर्माणको मस्यौदा प्रदेश सरकारलाई हस्तान्तरण
पोखरा महानगरपालिका शिक्षा महाशाखाद्वारा तीन सय ९४ विद्यार्थीलाई छात्रवृत्ति
परिवार नियोजन संघको ४३ औं वार्षिक शाखा सभा
स्वास्थ्य क्षेत्रलाई मजबुत बनाउन गण्डकी सरकार क्रियाशील ः मन्त्री थापा
Archives
Archives