पोखरा, ५ चैत । दुग्ध विकास संस्थानले पोखरामा पनि दुग्धजन्य पदार्थको विक्री शुरु गरेको छ ।

संस्थानले पोखराको सृजनाचोकमा विक्री केन्द्र स्थापना गरी बिहीबारदेखि दुग्धजन्य पदार्थको विक्री शुरु गरेको हो ।

पोखरामा नियमित रुपमा दुग्धजन्य पदार्थ उपलब्ध गराएर सहज रुपमा उपभोक्ता माझ पु¥याउने संस्थानले जनाएको छ ।

विक्री केन्द्रमा दही, ध्यू, पनिर, बटर, चिज, फ्रेस मिल्क लगायतका १२ भन्दा बढी दुग्धजन्य पदार्थको विक्री वितरण हुने विक्री केन्द्र प्रमुख हरिराम पौडेलले जानकारी दिए ।

पोखरामा स्थापना गरिएको विक्री केन्द्रको शुभारम्भ गर्दै भूमि व्यवस्था तथा कृषि सहकारी मन्त्रालय गण्डकी प्रदेशकी सचिव सवनम सिवाकोटीले संस्थानको सेवालाई कृषक र उपभोक्ता माझ पुग्ने गरी काम गर्नुपर्नेमा जोड दिइन् ।

दुग्ध विकास संस्थानका महाप्रवन्धक रुद्रप्रसाद पौडेलले संस्थानले विक्री केन्द्र विस्तार गर्ने क्रममा पोखरामा पनि शुरु गरिएको बताए ।

उनले संस्थानमार्फत् शहरको पैसा गाउँ पुगेको र गाउँको दुध शहर झरेको बताए । उनले हाल प्रत्येक दिन एक लाख ७५ हजार लिटर दुध संस्थानमा संकलन हुने गरेको जानकारी दिए ।

कार्यक्रममा संस्थानका बजार विभाग प्रमुख संजीव झाले पनि बोलेका थिए ।