निर्वाचन हारेका हस्तीहरु

Avatar राष्ट्र न्यूज सम्वाददाता
मंसिर २६, २०७४
Mao-Congress-Uml-flag-768×344-870×403

काठमाडौं- नेपाली कांग्रेसका अधिकांश प्रभावशाली नेता प्रतिनिधिसभा निर्वाचनमा पराजित भएका छन् ।

 निर्वाचनको अन्तिम परिणाम आउन बाँकी रहे पनि सभापति शेरबहादुर देउवा, महामन्त्री शशांक कोइराला, पूर्वमहामन्त्री प्रकाशमान सिंहबाहेक अन्य प्रभावशाली नेता पराजित भएका हुन् ।

पराजित हुनेमा पार्टी नेता रामचन्द्र पौडेल, पूर्वमहामन्त्रीद्वय विमलेन्द्र निधि र कृष्णप्रसाद सिटौला, पूर्वसहमहामन्त्रीहरु रामशरण महत, अर्जुननरसिंह केसी र पूर्णबहादुर खड्का पराजित भएका छन् ।

निधिबाहेक सबै नेता वाम गठबन्धनका उम्मेदवारबाट पराजित भएका हुन् । निधिलाई भने राष्ट्रिय जनता पार्टीका अध्यक्षमण्डलका सदस्य राजेन्द्र महतोले पराजित गरे । २०४८ सालदेखि निरन्तर निर्वाचन परिणाम आफ्नो पक्षमा पार्दै आएका नेता पौडेललाई एमाले नेताले पराजित गरेका हुन् ।

समानुपातिक सूचीको पहिलो नम्बरमा रहेको नाम हटाएर चुनावी प्रतिस्पर्धामा उत्रिएका सिटौलालाई राष्ट्रिय प्रजातन्त्र पार्टीका महामन्त्रीसमेत रहेका राजेन्द्र लिङ्देलले भारी मतान्तरले पराजित गरेका हुन् ।

राप्रपासँग चुनावी तालमेल गरेर जाने पार्टीको केन्द्रीय नीतिविपरीत सिटौला मैदानमा उत्रिएपछि त्यसको असर अन्य क्षेत्रमा समेत परेको कांग्रेस नेताहरुको गुनासो छ ।

त्यस्तै पार्टी राजनीतिमा मात्र नभएर राष्ट्रिय राजनीतिमा पनि भूमिका निर्वाह गर्न सक्ने विश्वप्रकाश शर्मा, नवीन्द्रराज जोशी, प्रदीप पौडेलसहितका युवा नेता पनि पराजित भएका छन् ।

प्रधानमन्त्री पत्नी आरजु राणा, केन्द्रीय सदस्यहरु महेश आचार्य, शेखर कोइराला, नारायणप्रसाद साउद, महालक्ष्मी उपाध्याय, अम्बिका बस्नेत, प्रकाशरण महत, दीपक गिरी, मोहनबहादुर बस्नेत, शंकर भण्डारीसहितका नेता पराजित भएका छन् । शेखर, नवीन्द्र, प्रदीपसहितका नेता हजारभन्दा कम मतान्तरले पराजित भए पनि अन्य नेताको मतान्तर भारी छ ।

पार्टी सभापति देउवा, महामन्त्री कोइराला, पूर्वमहामन्त्री सिंह, नेताहरु भीमसेनदास प्रधान, गगनकुमार थापा, राजेन्द्र केसी, भरतकुमार शाह जित दोहो¥याउन सफल भएका छन् । मीनेन्द्र रिजाल, मोहन आचार्य पनि निर्वाचित भएका छन् ।

त्यसैगरी वाम गठबन्धनका दुई ठूला हस्ती पनि पराजित हुन पुगेका छन् । वाम गठबन्धनको सूत्राधार मानिएका एमाले उपाध्यक्ष वामदेव गौतम र नारायणकाजी श्रेष्ठ पनि पराजित हुन पुगेका छन् ।

बर्दिया–१ बाट चुनाव लडेका गौतम नेपाली कांग्रेसका सञ्जय गौतमसँग ७ सय ५३ मतले पराजित भएका थिए भने माओवादी केन्द्रका वरिष्ठ नेता श्रेष्ठ गोरखा–२ बाट नयाँ शक्ति नेपालका संयोजक बाबुराम भट्टराईसँग ७ हजारभन्दा बढी मतान्तरले पराजित भएका हुन् । मुलुकभर वामपन्थीको पक्षमा जनलहर आउँदा यी दुई हस्ती पराजित हुन पुगे ।

त्यसैगरी, कमल थापा नेतृत्वको राप्रपा र पशुपतिशमशेर राणा नेतृत्वको राप्रपा प्रजातान्त्रिकका शीर्ष नेता पनि पराजित भएका छन् । राप्रपाबाट वाम गठबन्धनको समर्थन पाएका राजेन्द्र लिङदेनबाहेक अरु सबै पराजित भए । लिङदेनले कांग्रेसका कृष्ण सिटौलालाई करिब १३ हजार मतान्तरले हराएका हुन् ।

राप्रपा अध्यक्ष कमल थापा मकवानपुर–१ मा एमाले उम्मेदवार कृष्ण दाहालसँग पराजित भए भने सिन्धुपाल्चोक–१ बाट पशुपतिशमशेर राणा एमालेकै शेरबहादुर तामाङसँग पराजित भए ।

राप्रपा प्रजातान्त्रिकका सुनिल थापालाई धनकुटामा एमालेका राजेन्द्र श्रेष्ठले पराजित गरे भने रुपेन्देही–३ मा दीपक बोहोरालाई एमालेकै घनश्याम भुसालले पराजित गरे ।

चितवन–३ मा विक्रम पाण्डेलाई माओवादी केन्द्रका अध्यक्ष पुष्पकमल दाहालले पछि पारिरहेका छन् । जारी गणनामा पनि राप्रपाका अन्य कुनै नेता प्रतिस्पर्धामा देखिएका छैनन् ।

स्रोतः नागरिकन्यूज

Related News

सम्बन्धित समाचार

  • फेरि होला लकडाउन ?

    Avatar राष्ट्र न्यूज सम्वाददाता चैत्र ११, २०७७
    काठमाडौं : कोरोना भाइरस संक्रमण रोकथाम तथा नियन्त्रण गर्न लकडाउन गरिएको एक वर्ष पूरा भएको छ। सरकारले ठीक एक वर्षअघि चैत ११…
  • राष्ट्रपति भण्डारी बंगलादेश जाने

    Avatar राष्ट्र न्यूज सम्वाददाता फागुन २८, २०७७
    राष्ट्रपति विद्यादेवी भण्डारीले छिमेकी मुलुक बंगलादेशको भ्रमण गर्ने भएकी छन् । भण्डारीले चैत ९ र १० गते बंगलादेश भ्रमण गर्ने…
  • फेरी बढ्यो पेट्रोलियम पदार्थको मूल्य

    Avatar राष्ट्र न्यूज सम्वाददाता फागुन १८, २०७७
    भारतीय आयल निगमले पेट्रोलियम पदार्थको मूल्य फेरि बढाएर पठाएको छ। आइओसीले सोमबारदेखि लागू हुने गरी पेट्रोलियम पदार्थको मूल्य बढाएर पठाएको…
  • आज श्रीस्वस्थानी व्रत सकिदै

    Avatar राष्ट्र न्यूज सम्वाददाता फागुन १५, २०७७
    पोखरा, १५ फागुन । पौष शुक्ल पूर्णिमा दिनबाट शुरु भएको श्रीस्वस्थानी व्रत आज सकिदै छ । आजबाट श्रीस्वस्थानी परमेश्वरीको पुस्तकलाई…
  • बर्ड फ्लुको उच्च जोखिम

    Avatar राष्ट्र न्यूज सम्वाददाता फागुन १४, २०७७
    छिमेकी  जिल्ला सुर्खेतमा   समेत   बर्डफ्लु   भेटिएपछि   बाँके जिल्ला  सो रोगको  अत्यधिक  जोखिममा  रहेका बेलासमेत  भारतबाट  अवैध…

Trending